السلام الداخلي والصفاء النفسي من الحاجات اللي مبتجيش لوحدها أو باني مجرد أتمناها  أو أستناها تحصل.  لازم اسعى لها بنيه واشتغل عليها كل يوم

من الحاجات اللي بتسبب احساس السلام الداخلي اني أبطل

أسعى للكمال في شكل حياتي وأفعالي وأولادي وعلاقاتي اسرتي ونفسي وبيتي وأدائي وووووووووو

أسعى اني أربي أولاد مثاليه

  أسعى اني أكون الزوجة المثاليه أو الأم المثالية أو البنت المثاليه أو أو أو أو

أحاول أرضي كل الناس

أحاول أسيطر على امور حياتي وحياة اللي يهموني

أتعلق بأي متغيرات…………يعني من الآخر اتعلم أبطل أتعلق بأي حد أو حاجة حتى أقرب الناس ليه

تكون توقعاتي من نفسي ومن اللي حواليا مش في محلها ومبنية على صورة أنا رسمتها للي المفروض يحصل مش على المعطيات اللي موجوده فعلا

المقارنه بكل أشكالها وألوانها

أحاول أعمل كل حاجة

 أحارب ضعفي ومشاعري السلبيه

أحس اني المفروض أكون ايجابي وكويس علطول

واني أبدأ

أتعلم فقه الأولويات واميز كويس بين الأساسي اني أبذل فيه وقت ومجهود دلوقتي وبين المهم وبين للي نفسي أعمله أو وعدت أعمله أو جرت العادة اني أعمله بس فعلا مش وقته دلوقتي أو مش لازم أنا شخصيا اللي يعمله

أختار معاركي بحكمة وأوفر مجهودي للي فعلا يهمني ومجهودي فيه في محله– مش كل فعل يستاهل رد فعل قده ولا كل سؤال محتاج رد كامل ولا كل موقف محتاج انفعل معاه ومش كل حاجة تحصل قدامي محتاج أعلق عليها ولا دايما لازم أثبت وجهة نظري

اريح الناس اللي حواليه أكثر باني أوافق على رأيهم وأحسسهم بأهمية كلامهم طالما الموضوع هيبسطهم وبسيط ومش هيؤذيني

أخصص وقت مقدس في جدولي حتى لو ربع ساعة كل يوم أعمل فيه حاجة بتسعدني بجد

أميز ايه اللي المفروض أقول عليه “لأ” واتعلم اقول “لأ” بحزم ومنغير ما أخسر حد

يكون عندي يقين حقيقي ان ربنا بيعمل لي الخير في كل وقت واني فعلا معرفش ومفيش حاجة في ايدي غير السعي وبس

اتقدم ولو خطوة واحدةصغيره كل يوم في اتجاه تحقيق أحلامي الكبيره

أتقبل اني عندي نقط ضعف وعندي عيوب وان ده هيفضل جزء لا يتجزأ مني

أتقبل فكرة ان التغيير سنة الحياه وان عشان حاجة جديدة تبدأ حاجة قديمة ممكن أكون كنت بحبها أو متعوده عليها هتخلض وان فترة الانتقال بين مرحلة ومرحله دايما متعبة ومؤلمة

أتقبل الفوضى الداخلية والخارجية كجزء طبيعي من الحياه

اقضي وقت أكثر مع ناس بتحبني بجد وبتسعد قلبي ومؤمنة بيا وفخورة بيا وبتساعدني أطلع احسن ما فيا

 

مش مهم خالص تعمل كل ده مرة واحدة. اختار اكثر حاجة ممكن تحسن حياتك دلوقتي لو بطلتها أو بدأتها وأبدأ بيها واشتغل عليها كل يوم وراقب حالتك