قصة تتسم بالشجاعة والإرادة والثقة واليقين

24_eman-el-shennawy-2تعرفت على ايمان وزوجها احمد الابياري لأول مرة في اجتماع الاتحاد الدولي للكوتشينج.  جذبني وشد اهتمامي طريقتها في التعامل مع الآخرين التي تتسم بالبساطة والود والدفء والألفة.  تتحدث معها أول مرة وكأنك تعرفها من سنين .  اشتريت منها اجندة النوتبوك كوتش لابنتي السنة الماضية واعجبت جدا بيها وبفكرتها الجذابة والفعالة ثم علمت انها أصدرت اجندة للحوامل بعد ان مرت بتجربة الحمل لأول مرة واعجبت جدا بابتكارها وروح المبادرة عندها.  والذي اكد لي انها امرأة حقا مميزة وشجاعة اني علمت انها مرت بمحنة مرض السرطان في سن صغير وانا شخصيا عندي تجربة مماثلة مررت بها مع أمي وعندي دراية ومعرفة كاملة بمدى صعوبة هذه المحنه التي وجدتها هي صعبة على المحيطين بها أكثر مما كانت صعبة عليها لأيمانها ويقينها بالله.  اليكم قصة هذه المرأة السيدة الشابة الملهمة

أنا واحدة ناجحة فى نظر نفسى ….. كنت وانا صغيرة البنت الكبيرة المسؤولة.  عندي أخت أصغر مني وهي اكتر واحدة صاحبتى.  زوجة لاكتر واحد فاهمنى و أم لأجمل بنوتة عندها 3 شهور دلوقتي. انا عنديه طول عمري ( لما بحط أمامي هدف هوصله يعني حوصله).  عندى إيمان قوى جدا أن ربنا بيحبني اوى وأن كل امتحان هو تحضير لحاجة اكبر.  بحب أهلي اكتر من اى حد و بحب أساعدهم فى أى حاجه.  بتبسط لما بشوف حد بيحقق حلمه وبتبسط اكتر لما بساعده يوصل.  ومن القيمة دى بنيت شركتى “ذا نوتبوك كوتش”.  طول عمرى كان نفسى اعمل حاجة و أكون ناجحة فيها و بالصدفة ربنا بعتلى الفكرة و ماسكه فيها بكل قوتي وارادتى.  مكانش ينفع ربنا يبعتلى حاجه بحبها و اقدر أساعد بيها عدد كبير من الناس واسيبها

عديت بتحديين كبار أظن أنهم مكانوش سهلين والحمد لله مريت منهم .  أول تحدي عديت بيه هو تجربة أصبحت فى كل بيت مصرى تقريبا وهى مرض السرطان.  جالى سرطان ثدي بعد عيد ميلادى ال25 بشهر تقريبا.  التجربه مكانتش بشعة بالنسبة لي بالعكس كانت عليه أسهل من اللي حواليه كتير.  تقريبا لأن كان عندى تقبل للفكرة جيدا بس مكنتش متقبله الضعف خصوصا أمام أهلى والناس اللي بيحبونى.  التجربة دى علمتنى اسيب كل حاجه على ربنا اكتر من الاول، وعرفتني انى أقوى من ما كنت عارفة عن نفسى و انى اقدر اعدى بكل حاجه ربنا هيبعتهالى علشان هو اللي بعثهالي وهو عارف اني أدها

 ثاني تحدي وده كان الأصعب عليه فى رأيي هو الاجابه على سؤال “انا مين؟”.  سؤال صعب الاجابه عليه عموما و أصعب فى مجتمعنا علشان للأسف كلنا شبه بعض، أو عايشين حياتنا زى بعض.  “انا مين؟” سؤال لحد دلوقتى بجاوب عليه عشان الاجابه بتتغير مع كل مرحله و تجربه عديت بيها.  و كمان عشان ثقتي فى نفسى رغم كل إلى عملته ومريت بيه كانت مهزوزة أو انا كنت شايفاها مهزوزة لحد ماحضرت مع لايف كوتش ساعه طلعت بيها مبسوطه اوى وعرفت اد ايه انا فخورة، مبسوطه و بحب نفسى.  التجربة دي شجعتني أدرس واكون لايف كوتش أنا كمان اساعد اللي زيي  

ودلوقتى بمر بتحدي جديد وهو ازاى أوفق بين الأمومة واحتياجات شركتى.  خلينا واقعيين.  اكيد فيه حاجه هتقع من الواحدة خصوصا لو كانت إمرأة عاملة و أم و زوجة. الأكيد أن الواحدة ممكن تعمل كل الأدوار دي فى نفس الوقت بس لازم تكون عارفة ايه أهم من ايه و ايه يجى قبل ايه امتى.  دى حاجة ممكن تسهل لو كل واحدة عرفت ايه القيم المهمه فى حياتها و تعرف ترتيبهم. مثلا لو هي واعيه أن قيمه الاسره أهم عندها و أصبحت تعطى وقت اكتر للأسرة من الشغل لما يكونوا محتاجينها مش هتندم على قرارها

أهم درسين علمتهوملي الحياة هما

التقبل : سواء تقبل المحن والعقبات أو تقبل الناس أو تقبل نفسي.  كلمه التقبل فى حد ذاتها كلمه سهله و كتير بنفتكر نفسنا متقبليين بعض ومتقبلين ذاتنا بس الحقيقة أن احنا معظم الوقت بنقارن نفسنا بالشكل المعين اللي في تخيلنا المفروض نكون عليه أو بنموذج عايزين نكون عامليين زيه.  المقارنه فى أساسها حاجه بناءه بس لما تكون مبنيه على التقبل والسعي لأننا نكون أفضل.  لو ركزت الست على إرضاء الآخرين أو نيل إعجابهم عمرها ماهترضى حد و هاتفضل دايما تدور على حاجه جديده/ صعبه تعملها و فى الأغلب هتعملها ( الست لما بتقرر تعمل حاجه بتعملها) بس مش هتحس من جواها انها اشبعت رغبتها ولا انها سعيدة

الإرادة والمثابرة : قبل ما تمشي في أي مشوار اتأكدي الأول من معنى المشوار ده بالنسبة لك.  يعني هتستفيدي ايه من تحقيقه وايه هيتغير فى حياتك لو وصلتي لهدفك؟  بعد كده لو عندك إرادة وكمان مثابرة كتيييرة اوى حتوصلي ان شاء الله.  كل حاجه لها معنى سواء صغيرة أو كبيرة بتيجي بتحديات كتير. الفكره هتستحملى ولا لأ

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s